國泰面試最緊要團隊

<轉載自2013年3月27日 明報 港聞版>

 

香港唔少年輕人都想投身航空事業，衝上雲霄成為「空姐」或者「空少」。國泰航空今年會招聘500名機艙服務員，噚日搞咗個工作坊，向24個大專院校學生教路面試技巧。國泰職業發展及招聘經理劉倬玲話，做空姐空少需要一定體力勞動，甚至要洗廁所，更要應付情緒低落嘅乘客同克服時差，絕對唔好以為份工只係行行企企。

洗廁所克服時差 絕非行行企企

工作坊嘅學生，噚日一齊試咗小組面試同英語測驗，劉倬玲發現佢哋經常忽略團體精神，會打斷其他人講嘢或者唔理人哋嘅感受，而且回答點解應徵呢份工時，唔少人都話覺得好玩、可以周遊列國、係童年夢想，甚至單純睇完電視劇就報考，畀人感覺好唔成熟。

佢提醒年輕人，做空姐空少唔單要積極主動、鍾意同各種背景嘅人溝通、精通兩文三語，仲要處變不驚、思想成熟。除咗面試技巧，空姐空少有基本入職條件，包括中學會考5科合格或文憑試5科達2級、具流利英語及其中一種亞洲語言，同埋伸手可以觸及高度達208厘米等等。入職之後，每月平均有1.7萬至1.8萬蚊人工，不過試用就要半年。