國泰等4空服員工會搞聯盟

<轉載自2015年5月30日 明報 加東版 港聞版>

國泰空中服務員工會前日同勞方談判達成共識，資方答允員方三大訴求。國泰工會噚日召開周年會員大會，答謝一班會員一直好支持工會行動，仲大送玫瑰花畀會員，昨日仲通過成立香港空中服務員聯盟，聯合埋港龍、英航同芬蘭航空本地工會，夾埋會有成過萬會員，相等全港三分之二空姐空少，實行壯大聲勢。

Emily噚日聽聞，國泰總經理Dominic Perret將被調職。有國泰員工話，Dominic一向好體恤員工，上星期工會發起包圍國泰城時，佢擔心下晝落雨，叫人開放體育城，鋪埋地墊畀員工避雨，不過聞說有高層唔太鍾意，叫人拆番地墊，仲話如果落雨就叫抗議員工返屋企。究竟係唔係呢件事令Dominic調職呢？

國泰就話呢個講法絕不正確，又強調有一套行之已久制度，管理人員會不時獲委到不同管理崗位，最新管理層變動會6月公布。