【Emily】投訴港台稱蔡英文「總統」 通訊辦裁欠理據

<轉載自2021年6月23日 明報 加東版 港聞版>

香港電台嘅節目受到唔少人關注，間中亦會引起一啲投訴，通訊事務管理局辦公室最近就處理咗一宗針對港台嘅投訴。立法會文件顯示，立法會資訊科技及廣播事務委員會向通訊局轉介咗一宗投訴，投訴人不滿港台節目《新聞天地》今年5月報道台灣疫情新聞時，提及蔡英文到訪當地疫情指揮中心，喺蔡英文名字後面加上「總統」一詞。

通訊辦調查後裁定投訴理據不足。通訊辦解釋，台灣當地一般都以「總統」作為蔡英文嘅稱謂，其他香港傳媒報道台灣新聞時都係咁用。通訊辦又指出，雖然「總統」一詞通常用於稱呼國家元首，有可能令人覺得節目違反「一中」原則，但相關報道並無明示或暗示台灣唔係中國一部分，亦無證據顯示使用「總統」一詞令報道有誤、違反《電視節目守則》。至於報道有無可能違反一中原則，就不屬於通訊局嘅管轄範疇。