國泰買完飛機買模擬艙

<轉載自2012年8月28日 明報 港聞版>

 

機場第三條跑道唔知幾時至落成，但國泰一於唔理，話會買多99架飛機，對機師嘅需求就梗係大啦。國泰原本有12個模擬駕駛艙，要24小時運作至夠用，即係部分機師要通宵訓練。所以國泰今年用咗2.6億，買入兩個新型號機種嘅模擬駕駛艙，唔單止模擬訓練嘅像真度提升，仲比舊款慳電85%。

 

加拿大生產嘅新模擬駕駛艙，型號係波音747-8F貨機同777-300ER長途客機，前者9月就會開始使用，後者今個月送到，家仍在裝嵌，要等多兩個月先用得。國泰上次買模擬駕駛艙已經係5年前嘅事，正在計劃2015年引入3個未面世空中巴士A350嘅模擬駕駛艙。

可模擬各地機場降落情景

國泰模擬駕駛艙經理甄述嚴話，新模擬駕駛艙可以模擬唔同嘅天氣情况、400種機件故障，甚至全球各地機場降落情景，設計轉用電泵，仲環保過舊款。Emily親自睇過，新款無論畫面、加速感覺都好似真嘅一樣，舊款嘅影像十似玩具，難怪甄生都話「啲山只係一個三角形」。

今年有350人接受訓練，見習機師完成訓練後，要喺模擬駕駛艙試飛3個月；民航處規定做緊嘢嘅機師，每半年就要訓練，唔怪得要排隊，仲要半夜先有得用啦。

新型模擬駕駛艙畫面像真度非常高，能模擬各種天氣情况、各地機場降落情景。國泰模擬駕駛艙經理甄述嚴話，只要有民航處提供嘅資料，日後機場第三條跑道都可以模擬。

國泰新買入波音747-8F貨機嘅模擬駕駛艙，耗資1.3億，等於一架飛機嘅十分之一價錢。