港龍新制服勁似國泰

<轉載自2013年3月28日 蘋果日報 要聞港聞版 欄名：隔牆有耳 撰文：李八方>

港龍航空今日起，所有空中服務員將換上新制服，同有13年歷史嘅舊制服講再見。其中最大改變，就係所有職級空姐嘅圍巾全部唔見晒，希望睇落年輕兼有活力啲；日後空姐嘅連身裙會以紅黑兩色配搭，而兩隻顏色會喺上胸做分界線，令成條裙嘅剪裁突出空姐上身線條；連官方短片中，試穿新衫嘅空姐都好開心咁話，套新衫突出到佢嘅體態呀。

空少嘅制服就會改用橄欖色，最基層兩級嘅空少都唔使再打呔，做到高級艙務長先至要。新制服由頂尖時裝設計師劉培基操刀，佢早前已幫過國泰設計新制服，所以港龍嘅新制服，同國泰嗰套好似樣，劉培基話喎，兩間姊妹公司，顏色相近唔出奇。

  港龍空姐空少今日以新制服示人，唔着外套嘅女裝連身裙（左），盡顯女士身材。

 

 

蘋果動新聞

http://hk.apple.nextmedia.com/news/art/20130328/18209947